‘නවකතාවේ ආඛ්‍යාන රටා’ අගනා වටිනා කෘතියක්…

බුක් ෆෙයා එකෙන් ගත්ත පොත් උදේ කාලයේ ටිකෙන් ටික කියවන අතර මෙතෙක් කියවමින් සිටි පොත මදක් පසෙක කරලා අද උදේ පෙරේදා මිලදී ගත් ‘නවකතාවේ ආඛ්‍යාන රටා’ කෘතියේ උම්බර්තො ඉකෝ හා ඔර්හාන් පමුක් ගේ නවකතා රචනය සම්බන්ධ අදහස් අඩංගු ලිපි දෙක කියෙව්වා.

විශේෂයෙන් ඉකෝ ගේ අදහස් වලදී ඔහු නවකතාකරණයේ බැරෑරුම් බව වගේම ඒ වෙනුවෙන් කළ යුතු අධ්‍යයන චාරිකාවේ දිගුවත්, නවකතා රචනයේ නිදහස් රචන රටාවත් ගැන කියවෙනවා.

ඊයේ මෙම කෘතියේ එක් පරිවතකයෙකු වන උදිත අලහකෝන් හමු වුණාම මං කිව්වෙ ‘ඉකෝ නවකතාකරණය ගැන දක්වන එක් අදහසක් නිසා මට නවකතාවක් ලියන්න තියන බය ගියා.’ කියලා.

මම පොත් කියවන්න ආරම්භ කළේ වයස 17 දි. දිවංගත මා ළබැඳි මිත්‍ර, මහැදුරු ඒ. වී. සුරවීරයන්ගේ ‘නවකතා නිර්මාණය හා අවබෝධය’ කෘතිය කොළඹ නාලන්දා විද්‍යාලයේ පුස්තකාලයේ ඇති දිගු මේසයෙහි කවුදෝ තබා ගොස් තිබියදී කම්මැලිකමට කියවන්න පටන් අරන් තමයි මා පොත් කියවීම ඇරඹුවේ.

එවක් පටන් සිංහල නවකතාවලියෙහි සියළු ප්‍රමුඛ කෘති කියවීමට සමගාමීව නවකතාකරණය හා එහි ශිල්පීය භාවිතාවන් වගේම ලෝකයේ විවිධ නවකතාකරුවන් නිර්මාණකරනයේදී අනුදත් මං ගැන ආසාවෙන් කියෙව්වා. පසුකාලීනව නවකතාවේ විවිධ ශානරයන් ගැනත් කියෙව්වා.
විෂය ගණනාවක් ස්වාධීනව කියවන්නෙකු වුණත් නවකතාකරණයට ඒත් මා තවමත් සූදානම් නැති බවයි මගේ අදහස. ඊට මා තවම ළදරුයි.

මේ පොතේ දක්වන ආකාරයට උම්බර්තො ඉකෝ පළමු නවකතාව ලියලා තියෙන්නෙ අවුරුදු 42 දි. ඔහු සතුව ඇති පුස්තකාල දෙකෙහි සමස්ථ කෘති එකතුව පනස් දහසක්ලු. එතරම් බහුල කියවන්නෙක් ඔහු. ඒ බව විශේෂයෙන් ඔහුගේ Foucault’s Pendulum වගේ කෘතියක් කියවද්දී හැඟෙනවා.

නවකතාකරණයට උනන්දු අය පමණක් නෙමෙයි නවකතා කියවන අයටත්, විශේෂයෙන් අද විවිධ සම්මාන විනිශ්චය මණ්ඩලවල සිටින විචාරකයින්ද මේවා කියවීම වැදගත් බවයි මගේ අදහස.

ඊයේ උදිතව බුක් ෆෙයා එකේදී හමුවූ වෙලේ මාර්කේස් නවකතාකරණයට අදාලව පැවසූ අදහස් ගැන අප දෙදෙනා මද වේලාවක් කතා කළා.

මගේ අදහස ඒවා තව තවත් පරිවර්තනය වී ලංකාවේ සාහිත්‍ය සමාජයට පැමිණිය යුතු බවයි.
මන්ද අද බොහෝ සිංහල නවකතා ශිල්පීය වශයෙන් ගොඩක් දුර්වලයි. රචනයන් බොහෝමයක් ව්‍යාජයි. අඩු දැනුමෙන් යුක්තයි. බොහෝ රසික දැනුමේ හා රසිකත්වයේ තරම අවතක්සේරු කරන තරම්.

එවැනි තත්ත්වයක් තුළ ලෝකයේ විශිෂ්ට නවකතාකරුවන් 17 දෙනෙකු නවකතාකරණයට අදාලව පළ කළ අදහස් මෙළෙස පරිවර්තනය කර පළ කළාට එහි පරිවර්තකයන් වන උදිත අලහකෝන්, රශ්මික මණ්ඩාවල හා මොහාන් ධර්මරත්නටත් මෙහි සංස්කාරක ප්‍රියන්ත ලියනගේටත් අපගේ ස්තුතිය හිමිවිය යුතුය.
ප්‍රකාශනය – නයින් පබ්ලිෂර්ස්

ජනක ඉනිමංකඩ

සබැඳි

Leave a Reply

Your email address will not be published.