‘දංගෙඩිය’ ආර්ථික බලය හමුවේ කදින් වෙන් වෙන සෙබාදහමේ හිස

බල අරගල හා සොභා දහමට එරෙහි ඊනියා සංවර්ධනයේ විපාක පෙන්වන විශිෂ්ට සාහිත්‍යය කෘතිය
චිංගීස් අයිත්මාතොව් යනු සෝවියට් සාහිත්‍යය වංශ කතාවේ නොමැකෙන සටහන් තැබූ මෙන් ම ශ්‍රී ලාංකික සාහිත්‍ය රසිකයන්ගේ ද හදේ පැළපදියම් වූ ආත්මීය සාහිත්‍යකරුවෙකි.
වේලාසන කොක්කු ඇවිත්, ගුරු ගීතය ,සමුගනිමු ගුල්සාරි ,ජමීලා ,ධීවර ගීතය මාතාව සහ මිහිකත වැනි විශිෂ්ට සාහිත්‍ය කෘති තුළින් අප වෙත සමීප වූ එම අප ආත්මීය සාහිත්‍යකරුවාගේ සාහිත්‍යකරණයේ අවසාන භාගයේ ලියැවුණු තවත් විශිෂ්ට ග්‍රන්ථයකි “දං ගෙඩිය “නවකතාව.
විශ්ව සාහිත්‍යයේ සුවිශේෂී ග්‍රන්ථ රැසක් ඇතුළුව ආයිත්මාන්තොව්‍ ගේ ග්‍රන්ථ රැසක්ද සිංහලයට පරිවර්තනය කළ ප්‍රවීණ පරිවර්තක චූලානන්ද සමරනායක මහතා අතින් මෙය පරිවර්තිතව සුභාවි ප්‍රකාශනයක් ලෙස 2017 දී පළ වී ඇත.
සෝවියට් රුසියාව නමින් රටක් අද ලෝක සිතීමේ නොමැති වුව ද එම සෝවියට් රුසියාව විසින් බිහිකළ මහා සාහිත්‍යවේදීන් පිළිබඳව අද ද අප දක්වන්නෙ අපිරිමිත සෙනෙහසකි.
මානව ප්‍රේමයේ අසිරියත් යුක්තිගරුක සමාජයක් වෙනුවෙන් කැප වූ අරගලයත්, ලොවේ අගතීන්ට එරෙහිව ස්වකීය ප්‍රජාවේ විරෝධයත්, පශ්චාත් විප්ලවීය සෝවියට් සමාජය තුළ නිලධාරිවාදය නැග ඒමත්, බල අරගලය හා සොබා දහමට එරෙහි ඊනියා සංවර්ධන ක්‍රියාදාමත්, ආදී පුළුල් පරාසයක් ආවරණය වන පරිදි මෙම නිර්මාණයේ දී අනාවරනයක යෙදුණු අයිත්මාතොව් ග්‍රන්ථය තුළින් ආර්ථික වාසි උදෙසා හා ආහාර අවශ්‍යතාවය උදෙසා අතිමහත් ලෙස සතුන් සංහාරයට ලක් කිරීම බලවත් පිළිකුලකින් යුතුව හෙළා දකී. ඒ සඳහා ක්‍රියාත්මක වන මිලේච්ඡ අධිපතිවාදි නිලධාරී ක්‍රමය නිසා බිඳ වැටෙන පාරිසරික සමතුලිතභාවය පිළිබඳව ඉතා සංවේදී ව ඔහු මෙම කථාවෙන් ගෙනහැර දක්වයි .
ඔවුගේ පෙර කෘතින් වලට සාපේක්ෂව මෙම පොත තේමාත්මක වශයෙන් වෙනත් මගක් ගත්තද සෝවියට් දේශයේ අර්බුදයේ මෝරා එමින් පැවති සමයේ සමාජ තත්ත්වය අවබෝධ කර ගැනීමට ද මෙයින් හැකි වනු ඇත .
ආයිත්මාන්තොව්‍ සෑම කෘතියකම මෙන්ම මෙහිදීද ඔහු , ඉතා ළයාන්විත හා හෘද සංවේදී භාෂාවක් මගින් පාඨකයන් ට අමතමින්, පෙනෙන සමාජයට යටින් දිවෙන රුදුරු යථාර්තයන් පාඨකයන් වෙත සංවේදී ව ග්‍රාහණය කරගැනුමට අවස්ථාව සලසා දෙයි .
“ඉන්දියානු මාතාවගේ කිරි බුරුල්ලෙන් උනා වැටෙන කිරි බිඳුවක්”!! ලෙස ශ්‍රී ලංකාව දුටු ඔහු “දුයිෂෙන් “,ජමිලා ” “තනබායි.”” යෙදිගෙයි”,වැනි ඔහු වෙතින් අප වෙත කැදවාගෙන එන ආදරණීය මිනිසුන් මෙන් ම දංගෙඩිය පොත හරහා අප වෙත ඇවිද එන “අව්දි” ද අපට ආදරය මෙන් ම යහපත් සමාජ පැවැත්මක් උදෙසා වන මිනිසා ගේ කැපවීම අපට මතක් කර දෙයි.
– ලලිත් රවින්ද්‍ර බෝපිටිය
‘දං ගෙඩිය’
සුභාවි ප්‍රකාශනයක් .
පරිවර්තනය .චූලානන්ද සමරනායක

Leave a Reply

Your email address will not be published.