‘පාස්කු ඉරිදා සමූල ඝාතනය දේශපාලන කුමන්ත්‍රණයක්’ – කාදිනල් හිමි ජිනිවාහිදී කියයි

එක්සත් ජාතීන්ගේ මානව හිමිකම් කවුන්සිලයේ 49 වැනි සැසිවාරය අමතමින් කොළඹ අගරදගුරු අතිඋතුම් මැල්කම් කාදිනල් රංජිත් හිමිපාණන් පැවසුවේ ශ්‍රී ලංකාවේ සිදු වූ පාස්කු ඉරිදා ප්‍රහාරය මහා දේශපාලන කුමන්ත්‍රණයක කොටසක් බවයි.
එහිදී උන්වහන්සේ මෙසේ ද පැවසුවේය
ගරු සභාපතිතුමනි, හිතවත් නෝනාවරුනි මහත්වරුනි
2019 අප්‍රේල් 21 වැනි පාස්කු ඉරිදා දින ශ්‍රී ලංකාවේ සිදු වූ මරාගෙන මැරෙන බෝම්බ ප්‍රහාරවලින් දරු දැරියන් අසූ දෙදෙනෙකු (82) සහ රටවල් 14 ක ට අයත් විදේශිකයන් 47 දෙනකු ඇතුළුව මිනිසුන් 269 දෙනෙකුගේ ජීවිත අහිමි වූ අතර පන්සිය (500) දෙනෙකුට වැඩි පිරිසක් තුවාල ලැබූහ.
මෙම සමූල ඝාතනය පිලිබඳ මුලින්ම ඇති වූ හැඟීම වූයේ එය හුදෙක් ඉස්ලාමීය අන්තවාදීන් පිරිසකගේ ක්‍රියාවක් බවය. කෙසේ වුවද ඉන් අනතුරුව ලද විමර්ශන වලින්පැහැදිලි වුනේ, මෙම සමූල ඝාතනය මහා දේශපාලන කුමන්ත්‍රණයක කොටසක් බවයි.
සිවිල් සංවිධාන සහ අප ද සත්‍ය සොයා දෙන ලෙස දිගින් දිගටම ඉල්ලා සිටිය ද වින්දිතයින් හට යුක්තිය ඉටුකිරීමට, ශ්‍රී ලංකාවේ රජය අසමත් වී තිබේ. ප්‍රහාරය පිටුපස ඇති සත්‍ය හෙළිදරව් කිරීම සහ වගකිවයුත්තන්ට එරෙහිව නීතිය ක්‍රියාත්මක කරනවා වෙනුවට යුක්තිය ඉල්ලා හඬ නගන්නන්ට හිරිහැර කිරීමේ සහ බියගැන්වීමේ උත්සහයක් දක්නට ලැබේ.
එහි ප්‍රතිඵලයක් ලෙස මෙම බිහිසුණු අපරාධය සිදු වී වසර තුනකට ආසන්න කාලයක් ගත වී ඇතත් පාස්කු ඉරුදින ඇත්තටම සිදු වූයේ කුමක් ද යන්න පිළිබඳව අපි තවමත් අඳුරේ සිටිමු.
මෙම අගතියට පත් වින්දිතයින්ගේ මූලික මානව අයිතිවාසිකම් බරපතළ ලෙස උල්ලංඝනය වූ අවස්ථාවක් බැවින්, අප එක්සත් ජාතින්ගේ මානව හිමිකම් කවුන්සිලයෙන් සහ එහි සියලුම සාමාජික රටවලින් ඉතා ඕනෑකමින් ඉල්ලා සිටින්නේ මෙම කවුන්සිලය මගින් පසුගිය වසරේ ආරම්භ කරන ලද සාක්ෂි රැස්කිරීම ඉදිරියටම කරගෙන යාමටත් පාස්කු ඉරිදා සමූල ඝාතනය පසුපස ඇති සත්‍ය සොයාගැනීමට අපක්ෂපාතී විමර්ශනයක් පැවත්වීම සහතික කිරීම සඳහා ක්‍රමවේදයක් සැලසුම් කිරීමටත් සහයෝගය දක්වන ලෙසටයි. යනුවෙන් පවසා ඇත.

Leave a Reply

Your email address will not be published.