“එදා පොහොට්ටුවේ නායකයෝ පොල් බෑය, ලූනු ගෙඩිය පෙන්නලා ඇහුවා දැන් සනීපද.. සැපද.. කියල. දැන් රටම අසනීපයි”

පසුගිය මැතිවරණයට පෙර ශ්‍රී ලංකා නිදහස් පක්ෂයට දුන් පොරොන්දු කිසිවක් ඉටු නොකළ පොහොට්ටුවේ නායකයන් ඡන්දෙන් පසු තම මන්ත්‍රීවරුන් කරපිංචා හපයක් සේ විසිකර දැමූ බවත් එදා පොහොට්ටුවේ නායකයෝ පොල් බෑය, ලූනු ගෙඩිය පෙන්නලා ඇහුවා දැන් සනීපද.. සැපද.. කියල. දැන් රටම අසනීපයැයි හිටපු ජනාධිපති පොළොන්නරුව දිස්ත්‍රික් පාර්ලිමේන්තු මන්ත්‍රී මෛත්‍රිපාල සිරිසේන පවසයි.
වර්තමානයේ රට තුළ මතුව ඇති තත්වය සම්බන්ධයෙන් අදහස් දක්වමින් ඔහු වැඩිදුරටත් පවසන්නේ මෙවැනි ආහාර අහේනියක් මැතිනියගේ කාලෙදිවත් නොතිබූ බවත් මිනිස්සු එදා මෙහෙම පෝලිම්වල කුණුහරුප නොකිවූ බවයි. ශ්‍රී ලංකා නිදහස් පක්ෂයේ මාතර දිස්ත්‍රික් සමුළුව අමතමින් හිටපු ජනාධිපතිවරයා මෙලෙස අදහස් දක්වා ඇත.
එහිදී වැඩි දුරටත් අදහස් දක්වන මෛත්‍රීපාල සිරිසේන හිටපු ජනාධිපතිවරයා… “රටම අවුල්. මේ ලෝකෙ දෙයක් දන්නේ නැති අය කියනවා මැතිනියගේ කාලේ වගේලු දැනුත් කන්න නෑ පෝලිම් කියලා. මම මැතිනියගේ කාලේ සතොසෙන් බඩු බෙදාහැරිය සැපයීම් නිලධාරියෙක්. මෙහෙම අහේනියක් තිබුණේ නෑ. මෙහෙම පෝලිම්වල කවුරුත් කුණුහරුප කිව්වේ නෑ. තනියෙන් රටක් කරන්න පුළුවන් කියලා හිතන්න එපා. හොඳ කණ්ඩායමක් ඉන්න ඕනේ. අවුරුදු 5ක් මම තනියම ආණ්ඩු කරපු කෙනෙක්. මං වෙනුවෙන් කතා කරන්න පාර්ලිමේන්තුවේ මන්ත්‍රිවරයෙක් හිටියේ නෑ. ආණ්ඩුවෙත් නෑ. විපක්ෂයෙත් නෑ. එහෙම අගමැති, ඇමති මණ්ඩලයක් නැතුවත් මම අද තියෙන අර්බුදයට රට දැම්මේ නෑ. 2015ටත් වඩා අඩුවෙන් බඩු මිල තිබුණේ අපේ කාලේ. අමාරුවෙන් රුපියල් 2කින් තෙල් මිල වැඩි කළාම පොහොට්ටුවේ නායකයෝ බයිසිකල් පැද්දා. ඒ අතර දන්නවානේ පොල් බෑය, ලූනු ගෙඩිය පෙන්නලා අහපුවා. දැන් සනීපද.. සැපද.. ඇහුවා. දැන් රටම අසනීපයි. ජනාධිපති ඡන්දයට කලින් ශ්‍රීලනිපය ගැන පුදුම වටිනාකමක් තිබ්බේ. පොදු ජන පෙරමුණේ ඉහළම නායකයෝ මාව කී සැරයක් හමුවුණා ද. වන්, ටූ, ත්‍රී තුන්දෙනා වෙනවෙනම මාව හමුවුණා. ශ්‍රීලනිපය නැතිව දිනන්න බෑ කියපු අය ඡන්දෙන් පසු පළමු සතියේම සන්ධාන ගිවිසුම කඩකළා. ගිවිසුමේ කිසිම කාරණයක් අද වෙනකල් ඉටු කරලා නෑ. කරපිංචා වගේ අරගෙන විසි කෙරුවා. ජනාධිපති ඡන්දයක් ළඟදි එන්නේ නෑ. ජාතික මැතිවරණයකට එන්නේ පාර්ලිමේන්තු මැතිවරණය. සමහරු කියනවා ජනමත විචාරණයක් ගැන. ජනමත විචාරණ තියලා කල් දික් කරගන්න ලෑස්ති වෙන්න එපා. ඒක කවදාවත් කෙරෙන්නේ නැති වැඩක්”යනුවෙන් පැවසීය.

සබැඳි

Leave a Reply

Your email address will not be published.